10月10日真係多大事發生，先有台灣倒扁天下圍攻大行動，跟住香港又有大鋼管從天而降壓毀多部汽車，但原來日本方面仲勁喎，係咩？咪係第10代ToyotaCorolla終於現身囉！
今趟推出嘅第10代Corolla，暫時只有4門及5門旅行車版，名稱方面略有改動，前者叫Axio，後者則仍被稱為Fielder；其中屬於第10代房車版嘅Axio，跟香港代理仍有發售嘅第9代型號相比，變得最多嘅會係車頭造型及車廂部份。老實講，新車車身線條跟現有款式差唔多，但車頭部份換成類似Camry嘅低斜設計，連頭燈都用上相類似Design，望落有啲房跑車嘅感覺；至於車廂鋪排都似足Camry，尤其係4幅式軚環嘅Design，不過我會比較Buy佢嘅中控台設計，至少唔會好似家陣咁玩成熟吖！Fielder旅行車都係一樣，只係車廂用黑銀兩色作配襯，同埋多咗個大尾廂而已。
機械配搭方面，如果你同我一樣係手波車Fans的話，我諗都會感到失望；因為今次廠方只安排1.5公升型號，加入5前速手波版本，以往屬頂級嘅1.8公升型號，則只有SuperCVT-i無段變速自動波，而引擎亦換上全新配備DualVVT-i嘅1.8公升引擎，馬力輸出136匹。
記者：鄭達基