襲擊何俊仁的打手落網，自稱最高興的，除了何鴻燊，還有下列一干人等：
曾特首。跑到天涯海角都會抓到你！曾特首這次沒有食言，講得出做得到，滅罪的決心讓市民痛快，應該可以挽回下跌的民望。
警隊上下。證明沒有老貓燒鬚，終於捍衞了警隊愈剃愈少的眼眉，自我感覺存在比黑社會好些少。
麥當勞。破案功臣之一是快餐店的錄影帶，在小朋友眼中，麥當勞叔叔比哈利波特更精叻，最憎垃圾食物的媽咪亦冇辦法唔幫襯。
鴨舌帽製造商。配合警方，盡快將抹黑的形象洗底，恢復鴨舌帽的清譽，撥亂反正宣示，戴鴨舌帽的衰人已經拉晒。
中小商戶企業。打手逃到內地後一樣天網恢恢，證明着草，還是在香港穩陣過大陸。開門七件事，着草都要消費嘛，冇理由益晒內地。以後在香港着草的蠱惑仔，肯定數目回升，有利振興本土經濟，唔使靠自由行撐場。
幕後主腦。打手一定會攬晒上身，主腦拍拍屁股鬆人，唔高興就假。
中產。施政報告派錢搞學券，又試觸動中產神經，嘮嘈狂呻，這樣下去遲早抑鬱便秘，唯有是但搵件事開心一下。睇勻港聞版只得呢件，照殺啦。