「潤發」有11年歷史，風雨不改凌晨5點開舖，鵪鶉蛋燒賣、蒸大包呢類老派點心，𠵱家無乜地方再食得到。工字不出頭，好多人都想有祖蔭射住，含金鎖匙出世嘅26歲太子爺麟仔就咁話：「細細個落舖頭幫手，行行企企夠鐘收工，閒人一個！得閒就約班Friend篤波落D。」兩個月前做掌門人，打真軍落手落腳砌，拎鑊煮餸手腳並用，雙手炒菜膝頭控制爐火，好有功架。「阿媽年紀大，見佢捱得咁辛苦，咪孭起支旗囉，晏晝12點到凌晨2點返足14個鐘，個個禮拜7日年中無休。」
辛苦嗎？「後生OK，反而老婆唔係好慣，唔慣我突然由閒人變咗成日唔見人。」𠵱家舖內大事小事都要理：「做老闆最難係管人，例如有夥計唔鍾意啲客食煙，就特登全場唔派煙灰缸，我咪要同佢講咁樣盞搞到通地煙灰，個場咪污穢囉。洗廁所都要理喎，清潔阿嬸洗3次都唔亁淨，我咪要遲收兩粒鐘親手洗多次，教埋畀佢知點先叫亁淨囉。」錢果然唔易搵，佢發自內心咁話：「血汗錢，𠵱家搵到錢唔會亂使，儲起嚟買基金，唔會好似你呢個記者仔咁，等我收工做訪問嗰陣閃去打機，一個月慳番呢幾百蚊打機錢，儲得幾年買車畀首期都得喇。」嘩，無端端講嘢咁似我娘親嘅？
記者：朱崇德 攝影：陳偉強
鐵板串燒鱔片$68
鱔片肥美，應份，叻在曉用牛油加黑椒汁撞落鐵板，鱔香完全充塞800呎舖頭，鱔片食落唔腥入口勁滑。
鵪鶉蛋燒賣$8
N年未見過，後生啲隨時未聽過㖭！燒賣蒸得夠亁肉味夠濃，鵪鶉蛋軟滑漏汁，想食老派點心，唔一定要去川龍嘅！
鳳爪排骨飯$12
7至8款盅仔蒸飯當中，最好賣係鳳爪排骨飯，飯底軟硬適中，食到一粒粒香米，排骨超嫩口，麟仔話佢日賣盅仔蒸飯500盅，我信。
潤發海鮮菜館（27480402）
地址：深水埗福華街159號地下
