快易名為長盈嘅長城數碼（689）近期股價表現相當矚目。長城數碼於上月獲「白武士」拯救復牌，100合1後再5供9，令大股東取得控制性權益，隨即獲錦興集團（275）以每股0.1元，認購2.95億股，長城數碼復牌後持續被錦興減持，由上周一至周四，合共減持4200萬股，在減持期間，股價反由0.228元升上至0.233元，可以講愈沽愈升。
長城數碼停牌3年後，本來已經進行除牌程序，且至最後階段，可以講係到垂死地步，但最後一刻靠曾擔任加怡融資董事總經理嘅本港資深銀行家打救，而呢間公司就由原本生產電子消費產品，轉型至近期熱門行業嘅有色金屬，雖然轉型成績有排先至見得到，但係作為長城數碼嘅股東，手上嘅股票可以講係由「牆紙」變「銀紙」。
呢位銀行家十幾年前已加入本港首富旗下嘅加怡融資，曾參與長和系內多個融資計劃，而錦興老闆「殼王」則與首富關係密切，諗諗當中人物關係，可能估到呢輪股權變動當中因由。
真樂發配股急升
另一隻異動股係真樂發（1003），日前股價急升24%，成為第5大升幅榜股。上周公司宣布以每股0.4元配售3億股，集資1200萬元，通告話係配售畀6名獨立第三者，照計咁細金額，如果配畀策略投資者，無理由要分6人。
歐陽風