如果我走去問10位經常揸車嘅朋友，佢哋最驚入嘅路段，我好肯定除咗有紅磡海底隧道一份之外，另一個地點就肯定係旺角，區內嘅大街小巷，差唔多全日24小時都會塞車，尤以「波鞋街」同西洋菜街、旺角道一帶為甚。最近喺《香港討論區》中，網友hinhinkid發起一項名為「旺角──最災難之街道（駕駛者）」嘅投票活動，入面詳列有多個旺角區內嘅塞車黑點，其中西洋菜街左轉旺角道呢個Point，暫時名列前茅，對此投下「神聖一票」嘅網友PASU^^話：「今日七點鐘等過，足足可以食個叉燒飯。」而一個悶人更答道：「唉，都唔知選邊個好，揸車去旺角真想死！」
其實有呢啲問題出現，跟的士小巴隨處停車等客、啲人隨便DoubleParking，甚至係巴士站及燈號分布等問題有莫大關係，只要政府方面重新設定有關設施嘅分布，問題便可解決。
記者：鄭達基
討論網址： http://www12.discuss.com.hk/viewthread.php?tid=2524323&extra=page%3D4