如果大家有留意，自《金手指》面世之後，孫柏文從未試過同大家談及有關祖國銀行嘅嘢。大家可能會問：「呢排遇上巨型祖國銀行上市潮，仲要上嗰隻就升嗰隻。孫柏文，你唔怕俾啲人話你out咩？」其實，大家都知道正當一個經濟體系急速增長嘅時候，最有機會賺大錢嘅行業，就一定係負責分配資金嘅銀行業。
大家試想想，正當一個經濟體系起飛嘅時候，一間銀行只要存款充裕，就會有大把機會放債畀好需要資金投資擴充嘅企業家、開始想置業安居嘅工人同初嘗物質享受嘅消費者。同時，因為經濟起飛，每一個借咗錢嘅人同公司，會發現還款負擔愈來愈輕，呆壞賬比率亦愈來愈低，喺呢個情況之下，啲銀行又豈能唔賺大錢呢？
不過，祖國啲銀行始終畀唔到信心我，因為我成日都覺得啲祖國銀行管理層好似啲計時炸彈一樣。大家可能會問：「點解你要咁講？」原因其實好簡單，大家問心嗰句，如果聽日全球主要報章嘅頭版新聞，都係報道話某祖國銀行嘅管理層全部俾政府拉晒，大家會覺得出奇嗎？
新舊壞賬齊出現
大家可能會反駁：「俾人拉？真係唔出奇，不過咁又點？我相信市場定價已經將『管理層一晚俾人拉晒』呢個可能性計算在內。」我反問大家，如果換轉係一間特區公司嘅管理層俾人拉，或者係花旗國公司，你唔覺得呢個係一個問題咩？大家想想，祖國銀行現今嘅管理層係點樣升上來，試想十、十五年前，現今班管理層仲係「二打六」嘅時候，佢哋要升職就只需要聽話。甚麼風險管理、信貸評核，根本都冇用，一個銀行職員升職最直接嘅方法，就係本地班「高幹」要投資啲乜，佢哋就聽聽話話咁攞錢出來。
如果借咗錢嘅企業，連利息都還唔到嘅時候，一個銀行職員只需要再借多啲錢畀間企業去還利息，問題就當「解決」咗，就算「未解決」最後變成呆壞賬，最終都有「阿媽」出手相救。根據中國人民銀行自己嘅數據，祖國銀行體系中呆壞賬比率由01年31.1%跌到06年初得8%，看落好似好令人鼓舞。
股票有死囚劉金寶簽名
不過被譽為「民營CIA」嘅stratfor.com計過數，首先有一半（大約將呆壞賬比率降低15%）嘅呆壞賬就被國家「收買」。跟住因自01至05年，每年祖國銀行借款總額都增21%，大約增加咗一倍，亦即係話只要完全冇新呆壞賬嘅情況之下，就算舊呆壞賬冇「處理好」，呆壞賬比率都可以15%跌到8%。不過你哋信唔信自01年冇新嘅呆壞賬？係完全冇，zero！有一日，新呆壞賬逐漸出現，舊嘅呆壞賬又未「處理好」，祖國啲銀行就冇可能放新債。冇得放債又豈能賺錢？
不過最後，我都希望大家踴躍去抽新股，因為一定有炒賣價值，但最好用白表去抽。點解？因為用白表抽新股，特別係得「一手」嘅時候，好多人都會收到一張張「實物」股票。咁股票上面就有管理層嘅簽名，如果大家當年有去抽中銀香港2388，就會收到一張由被判處死刑嘅劉金寶簽名。試問當今世上，幾多人可以話有一張有死囚簽名嘅股票？第日將股票同當年中銀出嘅、有劉金寶簽名嘅銀紙收齊一套，淨係攞上eBay炒都大把錢賺！