傍晚去咗老蘭嘅嘉年華，又係啤酒節，飲到wingwing哋，幾個姐妹行去PacificCoffee飲啲正常嘢中和吓。我慣性咁叫枝P字頭嘅礦泉水，但Mabel叫我試吓新嘢。
個樽幾靚，水果圖案仲係水彩畫咁，擺明係冧女仔啦。Mabel話呢枝嚟自澳洲嘅飲品ESPriT（雖然個名似，但同嗰隻時裝品牌無關㗎），基本上係有氣嘅清水，但加咗5%純鮮果汁，唔會好似齋飲水咁寡，又無一般果汁汽水咁甜。ESPriT主要喺連鎖咖啡店賣，味道幾多選擇，包括藍莓、檸檬青檸、熱情果、紅莓、士多啤梨同香橙，22蚊一支。
終於唔使淨係飲水，話減肥啫，有時都想飲啲有味道嘅嘢。Mabel話，500年後如果有科學家發現我哋嘅骸骨，可能會斷定骸骨生前身高5呎5吋，重110幾磅，「可以嘅話，我想同佢講，得100磅多啲咋！知唔知幾辛苦先減到咁呀！」
逄周一至周四刊出