鰂魚涌康山花園係居屋樓王之一，既有地鐵之利，又近住太古城中心大商場，所以，就算居屋一向畀人印象係質素較私人樓差，康山花園仍然好吸引買家，一個月平均有七八宗成交。近一年就有77宗買賣。
利嘉閣分行經理李嘉華話，最近錄得一宗第二市場成交，單位係2座高層F室，717方呎，成交價178萬，每呎2483蚊，拍得住九龍灣淘大花園同得寶花園呢啲私樓嘅價錢。
個業主喺87年用41.6萬一手購入自住，揸咗19年轉手，賺136.4萬，升值近3.3倍，套現換個大單位改善居住環境。
由於康山花園限制要入伙十年後先可以買賣，所以形成好多呢啲一手業主出貨個案，賣樓目的係因為居住面積唔夠用要再大啲，或者係仔女大咗搬走，地方多得滯，決定換番間細樓。李嘉華講，𠵱家康山約有50個放盤，當中八成係一手業主。業主賣樓後多數轉投康怡花園同西灣河嘉亨灣。
康山花園好多買賣都係第二市場成交，李嘉華解釋，因為自由市場價貼近康怡花園，買家若果畀得起，都寧願加多少，轉買康怡花園。
電郵地址：[email protected]