陳冠希有份演出嘅荷李活電影《不死咒怨》（TheGrudge）續集《TheGrudge2》，上個禮拜喺美國上映，更榮登上周美國票房榜冠軍。
兩型男坐鎮
不過佢嘅前緋聞女友MaggieQ仲犀利，自從去年接拍湯告魯斯（TomCruise）套《職業特工隊III》（M:I:III）之後，喺荷李活知名度即刻大增，之後仲帶挈佢有份參演布斯韋利士（BruceWillis）招牌作《虎膽龍威》（DieHard）嘅第四集《LiveFreeorDieHard》，馮仁昭收到風，最近又有片商睇中MaggieQ喇。
今次呢套戲叫《TheTourist》，係一套情慾懸疑電影，由喺《變種特攻》（X-Men）中飾演狼人嘅澳洲型男曉治積曼（HughJackman）間製作公司開拍嘅。喺戲入面，除咗曉治之外，拍過《星球大戰》（StarWars）系列嘅英國演員伊雲麥葵格（EwanMcGregor）都有份演出，MaggieQ可以一次過同呢兩位好戲之人合作，真係恨死唔少想進軍荷李活嘅女星。
此外，MaggieQ日前同華仔喺韓國釜山嘅電影派對上，宣傳新戲《三國．見龍卸甲》，華仔曾話過最欣賞嘅韓國演員係李秉憲，咁啱李秉憲都有出席派對，仲話好欣賞華仔，希望有機會合作，華仔即刻回敬話多謝佢嚟支持自己部新戲喎。