投資特攻隊今日再向英冠球隊修咸頓埋手，今次「修頓」唔再要讓球，相反喺周二作客鬥應近輸盤時機嘅1哥卡廸夫城時受讓，「客勝」有計。冷選吼歐冠盃賽事，些路廸主場對賓菲加博開和局。 文：蘋果波神
修咸頓啱啱喺上周六聯賽輸波，作客2:3不敵李斯特城，但該仗佢哋收起咗件年僅17歲嘅新星加廸夫巴利，似乎係留力今場作客對卡廸夫城嘅英國南部大戰。有睇過上一輪歐國盃外圍賽直播嘅球迷，都應該見識過加廸夫巴利為威爾斯妙射罰球嘅絕技；暫時就睇唔到話佢有咩病痛，照計可復出鎮守防線之餘，亦多一瓣入球本錢；尤其位處威爾斯嘅「卡城」，點都要拼盡「騷哥利」。
同時間，養傷多時嘅隊長中堅龍廸雲剛復出；以該隊現時整體質素，喺英冠真係冇邊幾隊秤得贏佢哋。事實上，修咸頓季前亦係來季升上英超嘅熱門分子，今仗係英國南部打吡戰，卡廸夫城雖貴為榜首球隊，都好難話「讓球主客和」要讓住對手一球嚟踢。
「修頓」拉斯亞克腳風順
修咸頓嘅波蘭前鋒拉斯亞克目前以8球居射手榜次席，比剛奪9月份最佳球員獎嘅卡廸夫城射手祖柏仲多1球，一啲都唔輸蝕；以修咸頓今季客場平均每戰入兩球嘅攻力，加上守力增強，受讓真係冇有怕。
再睇卡廸夫城今季亞洲盤路成績，迄今於所有賽事12戰，贏8走2輸2，不敗率超過83%，太誇張嘞，莊家再唔調整一下，令到佢哋要回吐番幾場輸盤戰績，遲早俾人煲爆。所以今日開「讓球主客和」已讓得好盡，波友咪亂追捧。
至於冷選推介歐冠盃分組賽，些路廸主場打和賓菲加，兩軍同樣喺上周末聯賽大捷，些路廸憑中村俊輔「帽子戲法」，為我哋亞洲人爭光下，作客4:1大勝登地聯；賓菲加同樣作客出戰，4:0大勝利亞拿。雙方今日同挾剛順利贏波贏讓球盤之勢對碰，互無明顯優勢。
些路廸賓菲加和局啱數
雖然些路廸有主場之利，但蘇格蘭球隊近年實際表現，其實唔及葡萄牙球隊，打番個折頭下，大家都係咁高咁大；加上些路廸現時喺小組以2分領先賓菲加，今仗打和都無壞，仍有同榜首曼聯齊齊出線優勢，呢啲波最啱就係博和局。
投資特攻隊金句
今仗係英國南部大戰，卡廸夫城雖貴為榜首球隊，都好難話「讓球主客和」要讓住對手一球嚟踢。