工行（1398）昨日開始公開招股，未知各位讀者今次打算入票認購幾多數量？有心認購者自然看好新股的升幅，分得愈多當然愈好，借孖展認購的玩法，相信好多散戶係專家，星俠不如講些少今次天下圍「工」的傳聞。
聽聞有位散戶大哥被某間中資行AE游說落大飛認購工行，話有門路向國際配售部份入手，散戶大哥於是大額申購30球，博獲配更多股數，佢心諗入得30球，最差也應該獲配20至30萬股。點知昨日AE來電告之，表示最壞情況可能只獲配幾千股，大哥即刻有俾人點的感覺！
新股配售一向透明度有限，兩個人即使申購相同股數，但獲配結果可以完全不同。如果呢位散戶大哥入票申購30球，最後只得幾千股，就肯定要蝕息。
上望1.5-1.65元
二三線股開始異動，而油價反彈亦刺激幾隻石油股炒上。星俠反而有意吸納東航（670），除人民幣升值有利航空股之外，買入東航的另一誘因，是基金HCM最近大手增持該股至6%過外，增持時間在本月初，東航股價當時曾上衝至1.5元，創出52周新高，現時略作回氣亦十分正常。HCM本月初平均買入價1.422元，與東航現價相若。東航最近人事有變，希望可為集團帶來新氣象。股價有機再試1.5元高位，升破的話，可挑戰1.65元。
方星俠