廸士尼好萊塢酒店近排參加香港嘅「MLA黑盒廚藝大賽」總決賽,擊敗半島酒店、麗嘉酒店等,獲得最佳頭盤、最佳主菜大獎同全場總冠軍,仲將代表香港喺08年參加世界廚藝大賽,爭奪世界廚神嘅寶座。
呢個比賽嘅參加者全部都係32歲以下嘅廚師,廸士尼代表甘俊恆、梁志恆都只係28歲。佢哋細細個已立志做廚師,梁志恆仲透過睇卡通片《天才小廚師》,研究當中嘅煮嘢食心得,到𠵱家做咗廚師之後,就發現當日卡通片裏面嘅烹調方法都係真嘅。
今次呢個比賽都好特別,參賽者喺參賽前一日先收到兩大個神秘箱、20幾種材料。佢哋需要諗吓煮乜菜同點煮,仲要捱通宵先完成到比賽,所以佢哋話參加完比賽都好攰。