上周六車路士作客險勝雷丁1:0，除咗睇到佢哋兩個門將施治同古廸仙尼當黑傷晒之外，仲睇到隊長泰利好型嘅一面。比賽末段由於施治同古廸仙尼都傷出，搞到車路士尾段冇龍門可用，迫住中堅泰利要客串守龍門。
把關有瘦版馬田神韻
當古廸仙尼比對手批暈咗，只見泰利二話不說，走出場着起第3門將希拉里奧嘅龍門衫，再聽完摩連奴嘅戰術之後，落球場即刻召班隊友埋嚟，吩咐邊個守住呢度、邊個封住嗰度咁，啲隊長風範直頭出晒嚟，抵讚！
之後泰利「埋位」客串守龍門，睇見佢個look加埋件龍門波衫，話時話個樣都有幾分似曾經效力過愛華頓同列斯聯嘅門將馬田（不過當然係瘦版）。
泰利開埋龍門球場波就完咗，啲車仔球迷即刻衝出球場，泰利不愧係隊長，叫啲球迷唔好咁激動返上觀眾席先，甚有大將之風。
而雖然泰利着住件唔係佢個名嘅40號葡萄牙仔希拉里奧嘅龍門衫，但佢賽後都好大方咁順球迷要求送咗比佢哋，話晒電視機前第1次睇泰利守龍，佢呢件波衫分分鐘好值錢㗎！
「𠵱家古廸仙尼已經出院，施治就要觀察多1日，下場車仔隨時要希拉里奧把守最後一關；求大俠建議有錄低泰利守龍門嘅球迷最好keep起佢，事關咁珍貴嘅畫面唔係成日有㗎！」