馬主Y約飲下午茶，話文華裝修後復業，要去ClipperLounge坐吓。去到文華，ClipperLounge嘅面積縮小咗一啲，寬大梳化椅數目亦大幅度減少，全場滿座則一如過往，於是走過去餅店旁邊嘅咖啡店，好彩有位，睇嚟文華酒店M樓以後一定穩奪中環下午茶勝地嘅稱號。
馬主Y養咗無數隻「種馬」（stud）喺澳紐，對賽馬世界瞭如指掌，但世事好奇，佢自己喺香港養嘅三隻自購馬完全冇表現。好耐好耐冇拉過頭馬咯，反而佢賣畀人嘅「鴻運至尊」就四出四勝，世事真係難測。
馬主Y樂於捐款，不久前捐咗一億元畀朱敬文教育基金（據文匯報報道），以報答朱先生培育之恩。朱敬文（朝欽）先生在六、七十年代資助過千名學生到美國勤工儉學，好多人成為名校博士、教授，馬主Y就成為大富豪，憶苦思甜之後，覺得朱先生對佢一生助力最大，無時無日不心懷感激。佢畢業於賓大（UPenn），去年為母校搞籌款聯會，竟然俾佢諗到將「配種權」拍賣，買主可將自己擁有嘅雌馬與「幸運馬主」配種一次，結果賣得八萬港元。左丁山有啲唔明，問佢：「假如一位校友買咗，當捐款八萬元畀賓大，但佢自己冇養馬，咪嘥咗？」馬主Y話：「有市場吖嘛，『幸運馬主』配種費係二萬二千澳元，我哋可以幫捐款校友將配種權在市場轉售，佢有賺㖭！」
籌款活動多，至緊要不斷推陳出新，先至可以吸引捐款。最近「美國癌症協會」（AmericanCancerSociety）諗到「虛擬步行捐款」，一千人總共合計步行咗六百萬公里，籌到四萬美元。點會行到六百萬公里咁長呀？原來係用電腦網上虛擬步行，捐款人可以選一個「化身」（avatar），在電腦畫面上行呀行呀，行到無窮盡都得，香港公益金年年搞「百萬行」，唔知會唔會嚟一次網上虛擬步行籌款呢？美國人籌款最多方法，大小通吃，多多益善，少少無拘，香港嘅慈善機構有排學。