工商銀行係中國第5家南下來港「抽水」嘅中資銀行，據講，主承銷商為迎接香港投資者的需求，印備咗300萬份申請表。
華華粗略咁屈指一算，發覺交行、建行、中行、招行「連環招股」過程中，夾埋印咗至少900萬份申請表（仲未計加印），計埋今次工行在內嘅話，申請表嘅數量，喺短短1年就多達1200萬份！
民間團體「環保觸覺」估計，今次工行上市，會用上成千噸紙、斬幾千棵樹。咁家吓商業機構都要講社會責任，所以，工行特別呼籲申請人士注意環保，又喺全港收票行嘅收票箱上，貼出呼籲環保嘅海報。而佢哋今次又採取咗白表eIPO嘅申請渠道，希望可以減少用紙。
不過，華華估計工行呢個如意算盤未必有效，大家都知，大眾散戶一向都係中資銀行嘅忠實擁躉，但係今次白表eIPO只係可以用英文填寫，長者又未必識上網……所以話今次未必可以顯著減少用紙。
外牆顯示板show網址
提供白表eIPO服務平台嘅中央證券登記公司，為咗宣傳佢哋嘅服務，噚晚開始喺灣仔合和中心外牆，利用發光二極體（LED），組成顯示板，宣傳「中國工商銀行開啓eIPO大門」嘅口號，仲會顯示埋網上認購嘅網址。