公民黨九龍西支部噚日開幕，曾鈺成同劉千石都有嚟贈興。曾鈺成就寸班大狀話，公民黨同民建聯嘅理念相近，都係要為街坊服務，兩個黨最大嘅分別，就係黨核心嘅收入同身家，民建聯就差公民黨好遠喇！
俾人咁寸法，九西支部毛孟靜就窒番佢話，如果民建聯好似公民黨咁去爭普選，咁大家就唔會相差咁遠，阿曾都好應該表態支持2012普選！阿曾即刻縮骨話，佢唔係民建聯政制事務發言人，佢個人代表行會，要講都係講煲呔嗰套啦。
講開又講，原來曾鈺成條腰差唔多係全場最幼，分分鐘瘦過唔少女士。毛孟靜問佢點解咁瘦？阿曾自爆佢十幾歲起都係着27吋腰嘅褲，但做咗議員之後肥到31吋，但03年7.1遊行嗰排壓力大，發現自己膽固醇偏高，所以要節食，又變番27吋。