舉頭望天，香港呢幾年好難見到藍天白雲，環境運輸及工務局局長廖秀冬頭都大埋，加埋煲呔喺施政報告話要改善空氣質素，冬冬就更加頭痕。膠袋費未徵得，停車熄匙又話要諮詢，冬冬噚日惟有向小學生講環保古仔，希望佢哋大個之後可以愛錫環境。
其中一個古仔係「沙漠上的腳印」。冬冬話從前有隻駱駝，想走去沙漠另一邊睇吓，但被條蜥蜴大潑冷水：「沙漠咁大，實行死你！」但駱駝堅持己見，踏上征途。皇天不負有心人，駱駝終於憑毅力走到沙漠盡頭，仲發現咗個綠洲。
冬冬語重心長咁話，搞環保就好似隻駱駝咁，要有毅力，雖然間中有人大潑冷水話做唔到，但都要堅持落去喎。局長雖然無指名道姓話邊個潑佢冷水，但言語間都流露咗啲寃屈。
講完古仔，冬冬又同班學生真情對話。有個女生篤自己學校阿sir同校長成日着西裝、打呔，完全唔配合煲呔話輕裝上班。冬冬初時答話阿sir、校長其實可以唔打呔返工，但臨尾又兜返話「阿sir同校長可能要開好重要嘅會呢。」