黎明平時常有金句，前晚他為東亞唱片晒冷音樂會擔任司儀，更如黃興桂上身，頻說搞笑無厘頭廢話對白。當他與許志安緬懷當年情時，竟語出驚人說：「我唔識揸波！」原來他是想說駕車不懂揸波棍，令全場捧腹。
黎明（Leon）前晚在九龍灣國際展貿中心演出「AJohnnieWalkerMusicShow」，表演歌手還有許志安、衞蘭、衞詩及何超儀等。擔任司儀的黎明如足球評述員黃興桂般爆出不少無厘頭對白，他介紹新人Emily出場時說：「等我介紹以下落嚟呢位新人，不如留番佢自己介紹！」雷頌德讚他捧歌手很用心，黎明卻說：「想做就去做，等於我頭先想飲水冇水畀我飲一樣。」
「想講乜就衝口而出」
安仔演唱參加《新秀》時的參賽歌《霧之戀》後，黎明突然說：「音樂真係會令人沉醉，沉醉就會令人產生回憶。」安仔隨後讚他愛給新人機會，黎明竟說：「如果自己冇把握機會，佢哋就真係絕對空虛。」他接着便演唱《絕對空虛》一歌。
雖然對白搞笑，但黎明卻不慎說錯話，當他與安仔談及10年前駕車往燒烤時，他說：「我揸車入咗三波，我唔識揸波！」引得哄堂大笑，安仔也笑着彈開，並說：「嘩，你話乜話？」黎明裝作若無其事說：「我唔識揸波棍呀，我係入錯三波跣胎呀。」
雷頌德上台獻花給黎明，笑指他唱《絕對空虛》時表情相當尷尬，又建議他翻唱四大天王的金曲，並指黎明唱自己的金曲一定比當年唱得好，黎明說：「作為監製要我唱乜就唱乜，歌手可以將以前唱得唔好嘅歌演繹多一次，係好機會。」
黎明事後為「唔識揸波」自辯說：「我做司儀冇夾過㗎，諗起想講乜就衝口而出，個腦諗住把口就快，我唔係專業司儀嘛，梗會出現呢啲小趣事，觀眾一定會原諒我。我職業唔係司儀，勤力個天會睇到，所以人先有進步，冇進步個社會會停㗎！」
對於被指與劉德華合作拍戲，黎明謂不知情，他說：「或者時機成熟就有人會搵，Leon係一個人，Leon唔係一個先知。」對於有傳他打算結婚，他說：「冇諗過，你聽我講，世界上每個人都揀自己鍾意嘅人就得。」
拉大隊銅鑼灣唱K
安仔表示不知楊千嬅為避鄭秀文，而加盟黎明的AMusic，問他可會與鄭秀文合作？他說：「睇緣份囉，首要考慮係咪好歌或者好戲，唔想為咗noise去做。其實以前有人搵我哋搞二、三十場演唱會，我性格情願食飯盒都唔想用呢啲做賣點，所以兩個都拒絕咗，𠵱家如果有首好嘅合唱歌，或者我搵佢做嘉賓都可以。」完騷後，黎明拉隊到銅鑼灣唱K，衞蘭和衞詩等都有出席，但黎明逗留半小時便趕回家交人。
採訪：李珮洳
攝影：林德雄
