街工梁耀忠喺葵芳邨嘅辦事處噚日開幕。話晒阿忠嘅地區辦事處曾經俾人襲擊過，都算有啲風險，但今次完全唔使擔心，因為出席嘉賓名單上有「何俊仁」三隻字。仁哥去到邊都有唔少差人跟住，怪唔之得連仁哥致辭都話：「我加強咗呢度嘅保安，大家一定好安全。」
民政事務局常秘林鄭月娥同卿姐、石哥、李卓人幾個議員都有嚟祝賀。卿姐見到咁多警察喺度，就話希望佢哋都關注吓議員辦事處俾人攻擊、俾人淋屎嘅問題，唔好等到議員俾人扑先關注啦！
林太就講講吓又話做官其實幾大壓力，又要上立法會，都好難做㗎！卿姐就講笑話，林太又唔係巴士阿嬸，使鬼有壓力咩。