大連港（2880）今年4月28日上市，適值新股熱潮高峯期，公開招股部份超額認購700倍，招股價以上限2.575元定價。掛牌當日，最高見4.475元，高過招股價74%，可惜上市個零月，碌到落3.275元。隻股打橫行咗咁耐，上星期五見異動，收市報3.51元，升8仙，唔少網民表現好high，齊齊發言互相支持。
喺「Yahoo討論區」內，lok_bb4好雀躍：「2880開車啦……終於升破咗10天20天平均線。」
manky168終於見家鄉：「我喺3.45已入10000股，點知一路潛水，今日終於識搵錢啦，哈哈，前景仍樂觀，目標價3.6-3.65。」
「香港討論區」亦好熱鬧，tomastim信心十足話：「中國第一戰略性油港，長遠一定會大升！」
manky168轉移陣地再發表意見：「隻嘢又係慢慢升，真係等到頸都長。哈哈，大家都等吓，畀啲耐性啦。」
波羅的海指數 低位升逾倍
大連港係中國東北部最大油品及集裝箱港口營運商，位處渤海灣入口嘅戰略性位置。國家「十一五」規劃將力拓東北，大連港佔盡地利，配合埋中國經濟嘅強勁發展，大連港會係長線贏家。此外，反映運費嘅「波羅的海亁散貨指數」自一月低位2000點附近反覆大升至上星期五4169點，反映航運業經營環境大有改善，大連港亦能受惠。
隻股自6月中見底以來，雖然幾次上衝都受制3.85元，但3.40元亦連試幾次跌唔穿，反映支持力甚強。上月摩通同BNP發表報告重申睇好，目標價分別係4.50同4.10元，雖然高盛上星期五給予「中性」評級，但目標價3.80元都高過現價。隻股上星期五以陽燭升穿短期降軌阻力，成交股數逾15球，係6月初以來最大單日成交，反映買盤甚強。短線第一個目標3.85元，升穿可挑戰4.15元，跌穿3.40元止蝕。
余文