沙田馬場昨日舉行「婦女銀袋賽馬日」活動，名模周汶錡、LisaS.、樂基兒、港姐葉翠翠、陸詩韻和林莉等均打扮成窈窕淑女到場，翠翠說：「我以前喺馬會做過，仲試過做呢個活動嘅迎賓㖭，估唔到兩年之後有機會着到靚靚做嘉賓。」
問翠翠可有份演出即將舉行的無綫台慶？她聞言即酸溜溜地說：「冇呀，舊年台慶我出咗外選美，今年我有同公司自薦㗎啦，不過都係冇份。唉，意料中事啦，我都明白公司嘅制度，唔會十全十美嘅。」
鄺美雲黑衣冇運行
另外，有馬出賽的寇鴻萍穿上粉紅色衫到場，她說：「今日有馬出，梗係唔好着黑色啦！」同樣有馬出賽的鄺美雲則穿上黑色服裝到場，結果其愛駒「祿寶」首場賽事即告敗北。至於嘉玲契女郭秀雲透露萬聖節將舉行一個盛大派對，本欲邀住在泰國的契媽出席，但嘉玲卻回覆她：「都係唔係好啱我玩，除非妳叫埋肥姐（沈殿霞）嚟啦。」郭秀雲隨後補充說：「原來契媽唔知肥姐入咗院。」
採訪:吳天慧
攝影:陳偉權
