子承父業，仔女繼承上一代生意，理所當然。陳志雄都唔例外，6年前開始接掌老爹嘅「蝦記麵家」，舖頭除有一位蔡師傅負責打麵外，其餘一切運作如開舖、賣麵、入貨等，佢全部一手一腳頂晒。辛苦嗎？「辛苦，乜都要一腳踢，朝八晚八，十二個鐘做足七日，病都要頂硬上。有次條腰痛到飛起，行路行到好似隻鴨咁，都一樣要撐落去。唔知係咪成間舖得我一個，潛意識就唔畀自己病，試過放多一兩日假，就會無端端頭暈身[!C7F4]周身唔舒服，真係吹脹。」
「蝦記麵家」50多年前開業，由於麵餅質素高，又係米以外主要食糧，所以六、七十年代好風光。隨住巿區重建、街坊搬走、新一代口味轉變，生意已經無以前咁好。不過佢仍然想保住間舖，30歲嗰年正式接手。「接手前我做萬能達相機維修，頭一、兩年真係好難好難頂，直頭問過自己：『點解要做呢行呀？』但我唔做屋企就無人做，咪頂硬上囉，𠵱家慣晒，收工當放假。無生意嗰陣就上網，打吓Winning刨吓波經咁囉。俾我再揀嘅話，我應該唔會入呢行咯。」好彩，街坊都覺得啲麵靚，肯定有回頭客，其實好嘢實有人支持嘅。
記者：蘇振鵬
攝影：劉偉強
蝦記麵家（27121281）
地址：土瓜灣譚公道69號地下