下年特首小圈子選舉喺3月24日，為咗畀市民都有得投吓票，同揭露小圈子選舉嘅荒謬，全民投票實踐計劃將會喺同日搞公投，希望喺全港搵到40個票站，畀市民參與選特首。
何秀蘭話，如果梁家傑攞夠提名，咁到時就係曾梁對決；如果傑哥俾人封殺，咁就會畀市民投煲呔嘅信任票。
除咗特首之外，佢哋都要整多2、3條問題畀人投，例如係咪贊成2012普選？係咪贊成開徵銷售稅？同係咪贊成最低工資，希望可以借投票，迫煲呔對呢啲問題表態。
目前已經有十幾間學校，答應借出場地。何秀蘭話，當中有天主教、佛教、甚至官立學校（唔知會唔會俾李國章抽秤），佢哋會繼續去信畀啲辦學團體、社區中心，希望搵多啲票站，總之投票過程絕對有公信力，又有鍾庭耀監票，歡迎所有18歲以上嘅市民嚟投票，投完就蓋個印喺手度，咁就可以避免重複投票啦！