有最美麗港姐之稱嘅朱玲玲自從公開咗同霍震霆已經離婚兩年後，佢情歸何處自然成為大眾焦點。日前朱玲玲同好朋友林子祥、葉蒨文去咗上海，前晚出席好友兼緋聞情人羅康瑞旗下公司舉辦嘅「翠湖天地御苑金秋派對」。
上年瑞安集團嘅上海樓盤「翠湖天地御苑」搞宣傳，朱玲玲都有秘密捧場。今年情況唔同晒，羅康瑞喺派對上接受訪問，大鬧近排啲雜誌作古仔對朱玲玲造成傷害；朱玲玲則唔再咁低調，大大方方任影。
雖然前晚佢兩個冇坐埋一齊，但回復單身嘅朱玲玲公然坐喺羅康瑞後面，仲喺派對上交頭接耳，唔怕俾人見到。派對上，林子祥同葉倩文夫婦唱得開心，即興拉埋羅康瑞上台高歌，唱咗《無言的結局》同《AmericanPie》等，台下嘅朱玲玲睇得投入開懷之時，仲猛拍手掌，真係甜到漏。