電訊盈科提出用19.43億收購旗下SUNDAY資產，搞到SUNDAY因為冇業務而變成現金公司，咁樣係唔符合上市資格嘅，要除牌！
呢一招曲線變相將SUNDAY私有化，俾有股壇長毛之稱嘅網上股評人DavidWebb批評為唔光彩嘅做法，係刻意迴避上市公司私有化程序……呢個漏洞，其實早幾年前港交所已經知道，仲曾經發表諮詢文件建議修例。
相信大家都記得02年7月仙股事件，當時引發事件嘅細價股除牌諮詢文件，其實有一段講到，上市公司若刻意採取企業行動，令其變成現金資產公司，嗰啲行動嘅效果，其實等同於未經股東批准嘅私有化行動，所以呢，港交所當時建議，上市公司喺進行任何會變成現金公司嘅企業行動前，要引入規管公司私有化嘅規定，即係要獲得75%小股東批准，反對票亦唔能夠超過10%。
早有遠見有何用
如果一早改咗例，今次電盈買SUNDAY資產就要先經上述程序，難度會高好多，但現時只須獲SUNDAY一半小股東支持就搞掂。難為港交所早有遠見，但最終未能化成規例執行，怪就只能怪被仙股事件所累，成份諮詢文件被擺埋一邊。