由新鴻基地產（016）發展的荃灣爵悅庭，以「六星級酒店」豪宅自居，但其實質素參差。正如吳先生花近600萬元購入的「特色單位」，不單收樓水準欠理想，在入伙前夕，客廳廁所水箱竟無故湧出大量水，把全屋淹浸。發展商雖然承認，意外是水箱組件故障造成，卻拒絕承擔賠償責任，令吳先生大表不滿。
屬於服務式住宅的荃灣爵悅庭，以「六星級酒店」作為樓盤賣點，不過，業戶吳先生卻認為樓宇質素與宣傳不符。「好失望，覺得新地嘅交樓水準好差，窗台滲水，而廁所、廚房嘅地台就唔去水，淨係執漏都搞足個幾月，最後連屋都浸埋，你話我嬲唔嬲吖！」
水深九吋浸毀家具
吳先生今年3月24日，斥資594.62萬元，購入爵悅庭西爵軒高層一個面積978方呎的四房單位，同時另花25萬元裝修及訂做全屋家具。他原本計劃7月入伙，但7月13日，客廳廁所水箱竟突然漏水，由於當時屋內無人，未能及時阻截水源，大量鹹水不斷湧出，浸毀不少家具。
他其後接獲管理公司通知趕至，驚見單位已成澤國，水位最高達到九吋。管理公司派員檢查後，相信意外原因是廁所水箱內控制水位的波曲失靈，未能止水，導致水箱溢滿向外流出。
吳先生表示︰「我7月12號都有返過去，當時都冇事，唔明白無端端點解會咁，管理公司職員同我講，有可能係供應商供應嘅產品質素有問題，如果係咁，新地係咪要負責先？」
另外，吳先生又指出，單位的去水位欠暢順，也是間接造成水浸的原因。「我都唔明，全屋有兩個廁所、加埋廚房，總共有三個去水位，如果去水係做得好嘅，間屋都唔會浸得咁誇張啦；執漏嘅時候，我不斷投訴地台去水唔暢順，但發展商就淨係識得敷衍我，一味話符合標準。」
損失40萬僅賠7萬
吳先生經點算後，連同裝修、家具、電器及維修費用在內，加上無法如期入伙而額外付出的租屋開支，他合共損失40萬元，奈何吳先生最終只獲發展商的保險公司答允賠償70866元。
提起索償過程，吳先生便一肚氣︰「新地從來冇人接觸過我，由始至終，只係佢哋保險公司派公證行職員、以及管理處職員嚟睇過，但賠幾多？要等幾耐？就冇人同我傾過。我原先以為新地咁大間公司，點都會向小業主承擔部份責任，點知拖咗我3個月，𠵱家保險公司回覆我，只係會賠番單位原有嘅基本裝修，隨樓附送嘅電器就按損耗程度酌量賠償，夾埋大約得7萬蚊，其他就通通冇得賠，我覺得賠償額實在太小，好唔公道！」
新地指執修單無提水箱問題
本報就吳先生的投訴向新地查詢，該公司函覆表示，是次意外發生於7月13日，調查後發現是由於廁所水箱內控制水位的波曲失靈，未能及時止水，導致沖廁水箱滿溢。惟根據新地紀錄，該單位業主在提交的執修單中，從無提及有關廁所水箱的事宜，單位執修完畢後，業主亦於6月9日簽收及取回門匙。
新地強調，爵悅庭自去年年底首批業戶入伙至今，未有接獲類似報告，故是次事件純屬意外，該公司亦從無答允作出賠償。發言人又指，自意外發生後，服務處職員多次請業主盡快提交維修報價資料，以便保險公司的公證行能盡快處理，服務處亦曾提供相關報價供業主參考。另外，服務處於7月底收妥業主的報價後，已即時將資料交予公證行，並得悉業主已於9月21日收到公證行發出的賠償報告。
