唔少放盤業主怕煩，搵間相熟嘅地產獨家放售單位，諗住待遇會唔同啲，起碼相對一般放盤，個經紀會積極啲搵客，點知事與願違，情況仲好似啱啱相反咁，激到業主紮紮跳。QuentinChan就喺網上大吐苦水：「一向搵開佢哋都好好的，但我今次8月尾搵佢哋做獨家盤放賣同租，到𠵱家一個客都未睇過樓又冇影相賣廣告，係個市淡成咁定班友見我獨家盤，一年冇得走，懶懶閒咁。可以去邊投訴？」
「我知個市係差，但你哋都來我家望吓影吓相做吓嘢嘛，只係識坐喺分店話市淡冇客，我個價偏貴，大佬我96年尾買，𠵱家打6折，已經係市場價，重想幾平？要平我自己貼街招落燈柱搵客啦，使搵你？」
wawa555教路：「打個電話比個分行經理投訴咪得囉，啲細嘅死梗。」
網友frankie_bb1020同水上電單車異口同聲話，其實放俾地產公司做獨家係一個好唔明智嘅決定嚟㗎，因為如果由其他同事經手賣出，要分大概30%畀攞到獨家代理嘅經紀，唔係獨家盤，只係分2至10%，咁就形成咗其他同事唔會點做呢類盤。
漁翁撒網 客源多經紀積極
資深地產代理話，做咗同事攞番嚟嘅獨家代理盤，冇錯係分多啲出嚟，客源少咗在所難免，所以𠵱家啲客都好醒，只有唔夠1%業主會放獨家，除非自信個盤好罕有獨特，唔憂賣，又或者真係好怕經紀一日十幾甚至幾十個來電，否則漁翁撒網點都係着數啲。