上個禮拜尾香港海關再度出招，宣布07年正式啓用一個名為《網線行動》嘅監察軟件，用以追蹤BT檔案上下載，以及原種子（Seed）嘅發源地，從而對侵權行為發出警告甚至檢控。除咗出兵到商場封舖拉老翻，每次海關宣布任何網上監控活動，均被網民大肆批評其效用，今次《網線行動》以關鍵字搜尋侵權檔案，最令網民啼笑皆非，一致認為檔名可以改啫，你點Search？好多原種子都係外國網址發布，港海關亦無權拉人，有網友仲擔心香港變成大陸一樣，上網活動受到監控！
筆者認為，檔名可改，不過喺BT網上公開發布得出嚟，總會令下載者知道係乜啩？海關一樣可以扮會員「入網搜」，改乜檔名都冇用。其實海關諗咁多橋，最實際並非真係捉到人，而係希望從行動中帶出阻嚇作用，就算未能大幅減低BT侵權問題，起碼都唔好令呢種氣氛蔓延吖。
記者：徐影龍