早幾日有個巴士迷朋友Sent咗條Link過嚟，心諗係咪有咩正嘢呢？哈，真係唔睇猶自可，睇完嚇窒咗。原來係有部雙層九巴登陸澳門！不過，大家唔好以為係九巴走埋過去澳門發展喎，原來呢部巴士只係一部退役巴士，而且仲會成為一間「親子教室」。
雖然呢部巴士唔會再喺澳門境內行駛，但佢卻係繼20年前最後一部喺澳門行走嘅雙層巴士退役後，首次再有咁大型嘅巴士喺當地出現。咁又難怪搞到好多當地網民對呢部巴士登陸澳門一事展開討論；好似《澳門互聯網站》中，由網友阿斯蘭and卡嘉蓮所開嘅「想在澳門見雙層巴士，到這裏吧」Topic中，除貼出多張呢部巴士登陸澳門後嘅相片外，也惹來一眾網友回覆，例如~seng成~話：「其實可以將這架雙層巴士拖去新馬路至水坑尾一帶試吓夠唔夠高……如果得嘅話，澳門實買得雙層巴士。」另網友食人魚則話：「喺澳門，路窄彎多，根本不適合行駛雙層巴士，澳門廿年前係有雙層巴士嘅，後來因多方問題而被棄用。」從以上嘅回覆所見，不少澳門朋友都好希望雙層巴士重臨澳門，只可惜路面情況不許可，故只好繼續用單層巴士好了！
記者：鄭達基
《澳門互聯網站》討論網址： http://www.qoos.com/bbs/viewthread.php?tid=1295527&highlight=&page=1