我董凱林同姚明及劉翔係同鄉，自從喺今年7月由上海嚟咗香港後，發覺兩地最大嘅分別係香港人講嘢好快，有時搞到我好難聽得明，好在有葉嘉浩同周家駒兩位好隊友幫我做繙譯，𠵱家連老師同學都大讚我啲廣東話大有進步。
溫書練波瞓都冇時間
返學上堂都同以前好唔同，以往喺上海體校每日只得4節課，𠵱家喺香港就要上成8堂，足足多咗一倍，仲要上埋學校安排嘅英文班！有時真係好辛苦，不過為咗追番學業，冇辦法啦！
我自己每日上堂都寫咗滿滿嘅筆記，周家駒話我好鬼勤力喎！講真，唔勤力就肯定追唔上，所以我就連放假都要溫書同打波，去玩？我連瞓覺時間都唔夠啊！
香港有好多好地方我都好想去，好似尖沙嘴海旁，望下個海感覺唔錯，有人問我會唔會因為廣東話唔好，就避免單獨去街。其實咁諗只啱一半，我廣東話雖然唔係太好，但我唔會怕，始終係年輕人，適應力強，無論讀書定打波，我都可以好快適應；有緣嘅話，希望喺街場相遇。