貪慕虛榮，你咪唔認，你唔認你女友都認，平時想帶女友去五星級酒店Hightea，埋單每位三四嚿走唔甩。我刮到料，置地文華酒店有個抵食Teabuffet位位$198，保證女友食得有面又開心。仲嫌貴？平時喺度食個Tea每人至少$400，喫個Dinner無$1,000唔使落樓，仲嫌貴嘅話，返MK食魚蛋粉喇。
兩個半小時任食
提起去五六星級酒店食Buffet，大家首選尖嘴同中環區酒店，點解？無乜點解㗎，貪地點High啲酒店又High啲囉。嗱嗱嗱，做男仔嘅，問心，有無試過好似Va同Johnny呢對情侶咁，喺中環行行吓街女友忽然話︰「今Day假期唔使返工，我想食好啲，唔要茶餐廳，唔要大牌檔，要去酒店食Buffet。」知你聽到實流晒汗，我𠵱家教你點答，唔該背熟以下對白喇：「豪啲，請你去置地文華Tea。」
無講假，置地文華酒店新推出Afternoonteabuffet&bubbly，每位$198確係好抵食。嗱嗱嗱，假期女友實瞓到飽一飽先起身，裝埋身畫靚埋塊面出得街已經日上三竿，時間剛剛好，唔早唔遲，扮晒靚入酒店食個Teabuffet當早餐，有兩個半小時俾你兩個慢慢歎，有排Hea喇。喂，仲要係五星級酒店，五星級服務，食物質素又唔會將價就貨，貪慕虛榮都係咁話，想做半Day上等人有幾出奇？荷包鬆動嘅話個個星期嚟擦一餐都唔過份。咪嘞，我都撥個輪畀男友仔，屈番佢一餐先，唔肯請？撇硬佢……
煙三文魚日式芥辣忌廉鬆餅
煙三文魚味道適中唔會過鹹，最過癮係墊底嘅忌廉鬆餅，軟軟腍腍同三文魚嘅爽口口感好合拍，但就無乜芥辣味。
巴馬腿奶芝士法式麵包
另一受歡迎鹹點之一，巴馬火腿同奶芝士味道濃，份量一口一個啱啱好，男仔顧乜鬼儀態吖，一啖質晒入口最過癮。
藍莓芝士餅
粒粒藍莓鋪喺打得均勻嘅芝士上面，味道一清一濃配合得天衣無縫，芝士輕身，女仔咪顧住減肥，多食幾件都無妨。
朱古力蛋糕（左）、甘笋芝士忌廉蛋糕（右）、法式蘋果批
的骰蛋糕最討女生歡心，口味由最大路嘅朱古力到新奇嘅甘笋芝士都有。另外不得不試法式蘋果批，有淡淡酒香，嗜甜者必喫。
法式咖啡燉蛋（前）、士多啤梨奶凍大紅花啫喱（後）
法式咖啡燉蛋加一塊法國Macaron，好香口。士多啤梨意式奶凍大紅花啫喱砌成3層模樣，各用小玻璃杯盛載，賣相別致。
鵪鶉鹹餅（前）、大蝦五穀三文治
鵪鶉鹹餅一啖一件唔太漏，我咁細食都食到兩件；大蝦五穀三文治，用新鮮大蝦同香料特製的醬料搽在五穀包，飽肚健康。
三文魚、油甘魚、吞拿魚刺身及壽司
香港人咁鍾意日本菜，Buffet當然唔少得新鮮刺身同壽司，澳洲三文魚、油甘魚同菲律賓吞拿魚最受歡迎，唔使講咁多，新鮮就自然好味。
街坊有Say：每位$198抵唔抵？
搵食攻略
Amber（21320066）
地址︰中環皇后大道中15號置地文華東方酒店7樓
交通︰中環地鐵站E出口
營業時間︰早餐6:30am-10:30am、午餐12:00nn-2:30pm、晚餐6:00pm-10:30pm
Afternoonteabuffet&bubbly收費︰成人$198，小童$98，另收加一
供應時間：逢周六、日3:00pm-5:30pm