SONY喺東京遊戲展一招20GB版PS3降價，令到全球Fans叫好，約港幣$3,300定價只係跟八年前嘅PS2差不多！當時好多遊戲評論轉軚，改為針對PS3首批貨20GB版只佔兩成，反而佔八成貨量嘅60GB仲未落實改動細節，大家都質疑其降價目的只係轉移視線。雖然SONY將60GB版PS3定為自由價格（OpenPrice），冇官方定價，不過今日終於有定案唔使估！據日本多個電器銷售網所顯示，60GB版預定價約62,800日圓（約港幣$4,088），跟20GB未降價前相若。
兩個型號相差七百幾蚊港紙，60GB除咗硬碟容量較多外，其他規格上仲有對應Wi-Fi及MemoryStick、SD卡讀取器等，值唔值真係見仁見智。雖然網民普遍都支持降價消息，不過有部份機迷就嫌60GB版機前多咗「銀邊」，賣相唔靚仔喎！值得一提係最新消息指，PS3跟機只有一條AV線，不設任何色差、D-Sub或HDMI等HD線，但可以舊有PS2高解像接線取代，有心喺11月睇埋Blu-ray嘅機迷就要留意喇。
記者：徐影龍