兩大卡通人物專利電子產品生產商萬威同升岡都喺今屆電子展設置攤位，不過，唔知係咪唔想惡性競爭得咁緊要，萬威個攤位喺Hall2，升岡就喺Hall1。萬威𠵱家手頭專利有Barbie、Superman同Batman，主要生產電子教育產品；升岡就有喺美國風頭直迫Barbie嘅Bratz，同埋啱啱上個月取得嘅迪士尼特許經營權，負責生產電視機、DVD機、鬧鐘收音機等。
華華一聽到Batman同迪士尼，再諗起下年初《蜘蛛俠3》上畫，即刻問問兩大老細，未來有咩新人物出場，點知兩邊都賣晒關子。萬威財務總監蕭國強話，有個專利傾緊，應該比較適合男孩子市場嘅；升岡劉主席話，計劃購入著名真人美國電影英雄人物專利，問係咪蜘蛛俠，佢就笑晒口話係嗰類啦。唔通今次兩位老細都情陷蜘蛛俠？