每當見到有上市公司將年報放上網，華華第一件事梗係睇吓啲董事有冇加人工！啱啱將年報擺上網嘅思捷，年報披露幾位要員嘅人工都冇乜點加，好似就嚟唔做主席嘅邢李㷧，人工仲減咗0.52個巴仙，去到803.8萬。唔知有乜微言大義呢？點都好，相比邢生配股套現嗰嚿錢，呢啲簡直濕碎！
講番思捷要員，12月會榮升主席嘅高漢思，年薪雖然冇乜點加，但都有成6292.6萬，斷估應該入到全港上市公司董事薪酬三甲（和黃大班霍建寧通常係一哥）。而邢生另一位左右手、集團副主席兼財務總裁潘祖明，06年度薪金為2268.2萬，微增3個巴仙。
不過，思捷對啲非執行董事好慷慨，全部加人工25至36個巴仙不等，好似領匯主席鄭明訓咁，年薪就由22萬加到30萬。
而邢生嘅高球波友、恒生副董事長兼行政總裁柯清輝，年薪亦由22萬加到30萬。唔知柯大俠使唔使將薪酬上繳呢？