黃秋生唔好老脾就好多人都知，佢噚日又發作。佢同吳鎮宇、張家輝、林雪、何超儀同埋張耀揚喺將軍澳中心宣傳電影《放．逐》，佢上台見到布景板寫漏佢個名，即刻黑面指住個名單話：「我應該唔喺度。」點知鎮宇仲指住戲名潤佢：「你個名好大呀！」
司儀Monique（歐綺霞）之後問班演員拍戲期間有冇試過受傷，點知秋生、鎮宇同林雪踎喺台邊咬耳仔，完全當人冇到，張家輝幫口大聲話：「問你哋拍戲有冇受傷呀？」結果只係得張耀揚同林雪肯搭吓口。秋生塊面一直咁黑，到玩遊戲影大合照一樣，唔係擰歪面，就係望地下。
家輝幫口解釋
之後張家輝幫口同秋生解釋，話因為秋生去咗西班牙，原先話趕唔切返嚟，所以唔知佢會出席。
秋生接受電子傳媒訪問時仲發晒牢騷，唔多happy咁話：「商場活動對部戲冇乜大幫助，嚟到玩遊戲，小朋友都睇唔到呢部戲㗎啦！我之前去西班牙嘅影展，部戲反應幾好呀，啲人好認識電影，唔係今日呢度咁。」
