浩倫農業（1073）上周五股價急升30%，係第3大升幅股份，成交量多達50球，係04年以來最大成交嘅1日，浩倫今年3月公布中期業績前炒過一轉，本月24日將公布末期業績，如果純偷步炒業績，似乎「偷步」得太快，今個星期至開車都未遲。
升得咁急，市傳有策略投資者擬入股浩倫，呢隻農業股之前係做開植物生長劑，去年收購28種新開發殺蟲劑、殺菌劑等產品，但都唔係主力發展項目，該公司過去4年全力去建立一套完整銷售網絡，現時有50間農業超市及逾3000個分銷點，覆蓋10個農業大省市，該策略投資者，好可能係睇中呢點，利用呢個網絡大搞。
唔知係咪浩倫急升帶起其他農業股，定係農業股本身就有勢，相關股份全線急升，如一拖（038）升6.1%，轉型種樹嘅金威（910）升4.6%，搞肥料嘅海油化學（3983）雖然冇升跌，但掛牌之後已經升咗好多，另中國綠色（904）升1.1%。
高位調整逾3成
近日有關農業嘅國際消息，係個別農產品如橙汁及粟米價格創新高，假如呢個概念有得炒，從事可可豆貿易嘅環新國際（502）短線或者都諗得過。呢間公司今年4月炒轉主板，最高上到0.79元。不過，轉板後即時見頂回落，週整達36%，近幾個月股價喺0.5元徘徊，而且橫行咗咁耐，斷估風險唔會太大。
歐陽風