同事阿敏綽號叫千杯不醉，聚會都會飲番杯，但飲極塊面都唔紅，仲問隔籬組嘅同事攞酒飲。另一個鍾意飲酒嘅Wincy就唔同，飲親面紅到關公咁，但阿敏話：「聽講咁係好，塊面紅係酒精毒發晒出嚟，冇咁傷身。」如果係真，飲極唔面紅嘅阿敏，咪係渾身是毒嘅毒后？(|||-_-)
不過，家庭醫生關嘉美後來同我講，酒精會令面部因微絲血管擴張而泛紅，但唔同人嘅血管反應或者唔同，所以有人塊面紅啲，有人無咁紅；而且皮膚厚薄都會影響，皮厚嘅無咁易睇到血管，望落去無咁紅，相反就會見到好紅。(@^o^@)
不過，佢話面紅唔紅，酒精一樣傷肝或引起胃炎，甚至胃出血，所以「飲酒後面紅無咁傷身」係錯嘅。
佢仲話，有啲人鍾意喺冬天飲酒，以為暖身，但都唔係咁啱，因為酒精會令人體散熱更快，着衫唔夠又遇到冷風，好易體溫急降，引起低溫症。
「始終唔應該飲咁多酒嘅，不過有時工作唔如意，有時俾人飛，有時升職加薪，有時朋友生日……點都要飲少少嘅。」酒仙阿敏咁樣回應。
逄周一至周四刊出