港股上周度過一個不一般的「黑色星期五」，恒指創6年半新高，不過，市場嘅歡呼聲就唔係好大，因為好多股民都唔敢入市，反而淡友嘅呻吟聲就好勁，上去啲網上股票討論區睇吓，就知道淡友屍橫遍野嘅慘況。
跟住落嚟個市會點行？愈多人睇淡，繼續挾上去嘅機會就愈大，直到好多人轉睇好，調整先會出現。散戶有睇好睇淡兩邊，大戶都係咁，不過，每個時段都可能有唔同嘅話事人，好淡大戶已惡鬥咗好耐，但係從指數嘅走勢睇，好友依然主導大市，即係話佢哋話事，有時個市出現即市急回或者單日顯著回落，唔好即刻以為淡友反攻，呢啲動作好多時係主導大市嘅好友做出嚟，唔好先入為主，好易中招。
中電信C輪4982：中電信（728）上日報收2.87元，升0.3%，股價一度突破2.90元關。早前中電信升近2.88元阻力後現調整，但跌近20日線見唔少買盤收集，股價快速升回10日線之上，再試2.88元阻力，上日企穩呢個水平收市，成交冇顯著縮減，「陀螺」收市，個市氣氛咁好，應該可以突破炒上，3元係個心理關口，破咗位會炒上3.25元。
隻中電信C輪4982上日報收16.2仙，成交金額接近7000萬元，頗為活躍，仲有87日先到期，溢價5.9%，槓桿率17.7倍（有效9.6倍），對沖值0.54，引伸波幅27.4%，正股升上3元，4982應該會逼近24仙，正股升上3.25元，隻C輪應該唔會低過42仙，即係話就算正股升到3元有阻力，隻輪嘅潛在升幅都有4成以上，破位仲正，呢個價買番啲，正股跌穿2.78元止蝕。
俊 樺