李國章噚日又阿瑟王上身，大鬧牟利幼稚園唔達標（但達標與否其實只取決於受唔受政府管）。國王最愛穿新衣，通常做皇帝嘅都矇查查（又或者刻意將黑變白），阿瑟王噚日就連錯三次。
首先，佢噚日喺商台《政經星期六》話，一年學費6萬蚊嘅非牟利幼稚園如果想參加學券制，只要將學費減至4.8萬就得，到時收番張1.3萬面值嘅學券連同4.8萬學費，總共6.1萬，賺凸。查實如果學費4.8萬，家長夾埋張學券只需畀2.5萬，學校都係收4.8萬，有得賺嘅係家長。教統局局長都搞錯，偽學券制有幾混賬可想而知。
之後佢出席港台節目，現場有五位幼稚園生。阿瑟王扮親民咁問其中一個小朋友幾多歲，人哋話5歲，佢就話人哋係五人當中嘅大哥哥，點知小朋友即刻抗議：「我唔係大哥哥，我係大姐姐」，場面好尷尬。
喺節目中，李國章提起將成立嘅資優教育學院獲得一位富翁捐出一億元，「好高興何東先生捐咗……」何東老先生仙遊好耐，捐款人係何東後人何鴻卿至啱。