做人難，做鬼更難。海洋公園十月全城哈囉喂，人人買飛入場畀鬼嚇尋開心，誰知有鬼屋員工在網上擊鼓鳴寃，指好多心靈脆弱但行為橫蠻巿民，不但以粗口問候鬼怪的母親，甚至出手打鬼、嚇鬼；有網友更直擊嘩鬼員工要一邊扮鬼一邊勸內地客不要食煙，真箇「好鬼唔易做」。
一名鬼屋員工在香港討論區上吐苦水，大爆做鬼心路歷程，包括經常被人用粗口問候，又有中年叔父連群結黨違規帶電筒入場，更極為無品對鬼怪推推撞撞，「嚇你係我哋嘅職責，我哋冇錯㗎喎……你哋唔驚唔係我哋啲演員嘅錯，嚇唔到你仲要俾你哋撞，俾你哋推，你估我哋好過癮呀？」
鬼員工希望大家守規矩，膽小又貪玩者可以先同鬼怪聲明，眾鬼自會特別照顧。路見不平的網友對鬼怪非常支持，鼓勵他們繼續努力，批評香港人缺德，又建議膽小者改去賞花，「唔明啲人點解又要玩又玩唔起……如果人哋唔嚇你，你玩咩鬼屋啫，去得玩就要投入唔係搞事。」
爆粗網友公開道歉
不過，亦有搞事者良心發現，曾在園內爆粗「鬧鬼」的網友delhorno3公開道歉。臨床身心行為學家李寶能說，遊人被嚇，繼而罵鬼、打鬼的行為「正常過正常」，原因是大部份人潛意識不容自己失敗，「要搵方法平衡自己嘅恐懼，用短時間抵銷番，係非常之有效嘅方法，如果佢唔咁做，隱藏咗啲恐懼就手尾長。」
哈囉喂全場有200隻嘩鬼，部份進駐鬼屋，其餘四處出沒做遊魂野鬼，海洋公園發言人表示未收到員工投訴，又指每間鬼屋均有聯絡員讓員工求助，公園希望客人可以玩得開心。