政府開徵商品及服務稅（GST）諮詢引起社會強烈反對，親政府嘅香港青年聯會噚日就舉辦另類論壇，請咗一班支持者做嘉賓，包括香港會計師公會會長陳茂波、香港稅務學會會長鄒揚敦同城市大學經濟金融講座教授張仁良，兩個鐘不斷喺度宣傳政府要推GST嘅理由，好似同台下出席嘅青少年洗腦咁，令到唯一反對嘅商界代表、鐘錶業總會顧問梁青華孤掌難鳴，甚為無癮。
出席嘅財經事務及庫務局首席助理秘書長鄧智良難得聽到咁多人支持，自然鬆毛鬆翼，不過論壇主持香港電台節目監製謝志峰就引用華叔當年名句提醒佢，叫佢唔好高興住，「你呢度人多唔緊要，你睇吓出面嘅人有幾多？」