香港人出咗名羊群心態，一有熱潮就好容易掀起全城效應，連買樓都係咁。好似舊年1月開售嘅西環泓都，買同賣都一窩蜂，真係匪夷所思。
網友狙魔人喺自己個Blog上面話：「作為代理就真係有啲唔明，記得開盤嘅時候，過千準買家由早上等到半夜，由等一日變等兩日，飢寒交迫，怨聲載道，目的就係買間樓……好嘞，咁就到二手市場啦！當時大市氣氛都不俗，有啲客要加三幾十萬先可以買到貨……」
以為氣勢如虹？錯嘞，睇埋狙魔人點講先啦！「點知到舊年11月開始唱入伙，個市又開始回，泓都即時變『暈低』，班炒家減價求售，蝕讓兼加佣……中途有啲更意圖踢契，理由係點解第一座地下嘅花園有公廁，係人都入得，售樓書又無交代，當時亦都有傳媒訪問新世界，佢哋解釋已經公布過，周圍都查到資料，單憑呢一點係無可能取消交易。嘩！搞一搞，律師費都唔平，邊有業主會同你博呀！」
32宗取消合約
靜番一排，入伙5個月後又有問題嘞。根據土地註冊署資料顯示，共有32宗與新世界發展（017）簽署取消買賣合約，狙魔人半帶諷刺話：「唔通呢32個買家又係因為年紀大兼且比代理誤導，新世界學似恒基地產（012）咁破格體恤處理？！」呢位仁兄都寸得有道理嘅，話晒買樓唔同買棵菜，人云亦云盞自己損失啫。