泛海（129）上月尾宣布供股，股價插穿沙士期低位，粉絲價可以諗諗。
泛海NAV0.85元，現價（0.191元）相對折讓77%，本身已經殘到痹。再講，集團位處油柑頭嘅50%合營地產項目，連補地價後嘅成本約莫6億銀，樓面20萬平方呎，每方呎成本3000蚊咁大把。呢期大孖沙新地（016）喺鄰近青龍頭投地，樓面成本呎價講緊5930蚊。即係話，泛海未起樓，已經大賺地價升值。計計數，泛海應佔權益地價增值2.9億銀，每股NAV已經可以增值5.6仙到0.9元，折讓講緊係78%！
泛海宣布供股前，股價長企0.23元樓上，相信呢期3供1，連供股價0.175元計，成本唔會平得去邊。加埋經呢期供股，斷估可以排除泛海短期再伸手嘅機會。呢轉邊行邊炒，首站目標博兩成升幅到0.23元，未有耐到NAV水位。
力華超殘現價低博
力寶華潤（156）同上邊泛海一樣，係超殘股。力華最新NAV0.55元，現價（0.194元）相對折讓65%，折讓大到無倫。力華呢期除咗中、港地產，又發展星洲地產業務，頭炮紐頓路豪宅物業，5月推售以嚟，短短幾個月，幾乎售罄，估計全數套現近9億港紙，和味過和味龍。
力華星期二復牌以嚟，股價震過貓王，但有咁大NAV折讓墊底，唔怕買，擺中短線望NAV折讓收窄到50%，現價潛在回報率41%。
錢雋