講「我願意」，易過借火，可以不需要三秒，但這三個字說出口，要背負的責任卻是一生一世的。
說「離婚」，好像更容易，現代夫妻稍有拗撬，就忘了當日的誓言。
現代人的婚姻觀念難與從前相比，郭富城和楊采妮都無法接受。
還有人會憧憬公主與王子永遠過着幸福快樂的生活嗎？郭富城和楊采妮就是這一類瀕臨絕種的人，等待着一段天長地久的關係出現。
既然婚姻觀念相同，如果……他們兩個拉埋……
撰文：李珮洳
郭富城 傳統大男人
曾說過不到30歲不失身的郭富城，早已到了適婚年齡，近年他經常被問及終生大事，城城的答案千篇一律：「感情事都唔到我去心急，都係順其自然啦，事業上我仍然有好多夢想未實現，好似係音樂劇、電影……」話題又再在他牽引下回到工作理想上。
盡力維繫婚姻
對上一次與城城扯上關係的女星，是日本性感尤物藤原紀香，自此之後，身邊女人欠奉。城城自言意中人遲遲未出現，並非他要求高，而是沒有空尋覓，他日前接受訪問時說：「我唔係唔想拍拖、唔想結婚，我真係冇時間去搵對象，開完演唱會後就拍戲，拍戲後都係拍戲，啲工作一樣接一樣，我都唔知邊度仲有時間『唧』到出嚟搵女朋友。」聽來像是投訴，城城笑說連母親由最初恨飲新抱茶，到現在連問都懶，他說：「我媽咪四、五年前都好緊張我拍拖未，佢由開頭成日講出口話恨飲新抱茶，到𠵱家口水已經流亁流盡，索性唔再問。」城城表示多年來都沒有帶過任何一個女朋友回家給母親過目。
沒有女友，卻憧憬做好老公和好父親，城城表示自從拍完《父子》後，更自覺將來會是個好爸爸，他說：「套戲入面我係做一個好衰嘅老公，爛賭不特止，仲要借落周身債，天下間點可以有啲咁賤格嘅男人？我覺得一個女人同你結婚，你就要畀到佢幸福，唔可以做啲令佢傷心嘅事，呢樣係做老公嘅基本條件。」
城城認為他日結婚，一定會盡最大努力維繫婚姻，當然妻子紅杏出牆是絕對不可原諒，但其他錯失和夫妻間的問題他都希望盡力解決，他續說：「當你對另一半講『我願意』呢三個字嘅時候，就代表咗一份永恒嘅承諾同責任，所以唔應該有少少問題就中途放棄，將來我結婚嘅話，必定會竭盡所能去做一個稱職嘅老公。」
「唔畀太太做嘢」
城城自言是一個傳統大男人，他有這種思想，全拜父親所賜。在城城眼中，父親是一個家庭觀念極重的人，他說：「我爸爸係做金行管數嘅，每日佢都係成間公司最夜收工嗰個，佢好努力工作，將最好嘅畀晒屋企，媽咪就係全職家庭主婦照顧我，所以由細到大，我覺得男人就係應該擔起成頭家。他日我結婚，一定唔會畀太太出去做嘢，佢只要放心留喺屋企照顧小朋友，經濟上佢唔使擔心，到時我一定會減少工作，抽多啲時間畀屋企，咁樣先係一個有責任感嘅老公同老竇。」城城透露婚後想生一子一女，湊成一個「好」字，更希望是先生仔後生女，果然是一個不折不扣的傳統大男人！
楊采妮 一定要結婚
在《父子》中飾演郭富城妻子的楊采妮（Charlie），首次扮演母親角色，她笑言可以將潛在的母愛一次過發揮出來。Charlie自幼已很喜愛家庭生活，是個一定要結婚的女人，但她有個宗旨，就是「一係唔結，結咗就唔想離婚」。
再見亦是朋友
Charlie日前解釋：「以前年紀細拍拖，一唔鍾意、唔開心就會話分手，好易就放棄一段感情，但人大咗諗法都改變咗，知道一段感情最難嘅地方係點樣去維繫，點樣去互相尊重。婚姻係一個承諾，雙方愛大家先至會結婚，點解婚後要為一啲小問題就鬧離婚呢？如果他日咁唔好彩行到離婚呢一步，我諗我唔係咁易承受到。」
在多次的戀愛經驗中，Charlie慶幸遇到的都是好男人，雖然與舊愛邱韶智拍拖10年，最終也分手收場，但再見亦是朋友，她說：「點解分咗手就唔可以做朋友呀？我同佢嘅關係唔係報道寫得咁差，分手之後我哋變成一對好好嘅朋友，就算佢𠵱家拍緊拖都有話畀我知㗎，我都好戥佢開心。」Charlie當年視邱韶智為結婚對象，可惜兩人最後未能開花結果。問她會否感到可惜，她聳聳肩說：「我同佢同甘共苦過好多日子，大家嗰一刻好想繼續喺事業上再建立多啲，如果當時咁早結婚，我同佢嘅心智都未成熟，根本就唔係嗰回事。雖然最後我哋都分開咗，不過我每次拍拖都好認真，都會視另一半係終身伴侶。」
等待真命天子
Charlie與城城一樣，近年不停被問到婚期，但她不想因為結婚而結婚，她說：「我都講過我心目中嘅婚姻係一生一世，兩個人用一世嘅時間去維繫呢段婚姻，所以我覺得唔可以用時間限制自己去搵一個男人，之後就嗱嗱聲走去結婚，到時離婚咪仲嘥時間，既然呢個人未出現咁我咪等吓先囉，好過因快得慢，我真係唔想結婚NG呀。」
攝影：林德雄
場地提供：TheLandmarkMandarinOriental
