港區全國人大代表鄔維庸噚日下午出殯，喺歌連臣角火葬場火化，化作一縷輕煙而去。愛國分子噚日齊齊送鄔公最後一程，中方官員有高祀仁、李飛、王鳳超及呂新華等，政府高官亦有何志平、周一嶽出席，而前高官梁錦松、梁愛詩亦有到場致祭，可謂冠蓋雲集，極盡哀榮。
三年前曾經係沙士病患者嘅鄔維庸大仔鄔揚正，致悼辭提到爸爸嘅遺言，佢話爸爸其實仲未離開呢個宇宙，只係進入咗另一個空間，但係唔能夠同親友溝通。佢又話成敗得失對佢爸爸唔重要，亦唔應該計較名利，最緊要所做嘅嘢係對社會有益，所以佢整個人生都好豐盛，無憾無悔。鄔揚正仲提到，佢爸爸留院期間好安慰，因為佢受到好多親友嘅支持同愛護。
至於譚惠珠致辭時，就大讚鄔維庸智仁勇俱存，係良師益友、有赤子之心及高瞻遠矚，大有識英雄重英雄之意。
