周汶錡 緊貼潮流
「呢個網係睇啲最新潮流時裝，裏面可以搵到自己鍾意嘅牌子嘅最新服飾，又可以睇到世界各地嘅fashionshow。因為唔係咁多時間可以飛去唔同嘅地方睇show，上網睇亦係一個好方法，而且佢哋快過好多時裝雜誌，資料又齊全，啱晒女仔慢慢上去睇靚衫。」
推介網頁：www.style.com
2R 爆私生活
「我哋每日都會上自己嘅blog度睇，隔兩、三日就會寫一篇嘢，透過回覆fans嘅留言，同佢哋互相溝通，睇到佢哋寫畀我哋嘅嘢，好有支持同鼓勵，喺blog上面又可以識到好多朋友。我哋又會放好多私生活同工作嘅相上去，因為我哋自己都鍾意影相，有個地方同大家分享，好開心。」
推介網頁：hk.myblog.yahoo.com/2-R
鄭融 參考衣着
「我會睇自己喺yahoo個blog同埋睇mtv.com，基本上我個blog就會日日睇，得閒寫吓自己嘅感受。至於mtv.com，我就會睇吓外國啲歌手最新嘅MV，有時亦會有佢哋嘅專訪，所以我都會留意，因為可以從中參考外國歌手嘅衣着同埋佢哋喺舞台上嘅表演，自己亦可以從中學習。」
推介網頁：mtv.com
王菀之 當工作表
「我最常睇嘅網站就係歌迷同我整嘅IvanaParadise網頁，呢個網已經有年幾日子。我基本上日日都會上去睇個網，有時連有乜工作都係上去睇，而且佢哋upload我嘅相超快，日頭做完活動，夜晚就已經有我啲相。我仲有個留言區，等我可以喺上面同歌迷傾偈，真係好方便。」
推介網頁： http://ivana.ustage.com
黃伊汶 當睇雜誌
「我睇嘅網頁通常係服裝介紹，最鍾意睇呢個style.com網站。佢真係個好幫手，平時我唔可以經常行街睇有乜新衫推出，喺呢度可以睇晒全部牌子新一季服裝，當我摷唔到衫，就會睇番呢個網嘅。其實佢同fashion書都係一樣，只係佢好多唔同牌子都有，可以一次過睇晒。」
推介網頁：www.style.com
Julio(Soler) 偷設計橋
「我鍾意睇設計網頁，呢個網頁有齊全世界設計師嘅作品，唔使我周圍搵，一次過睇晒所有人嘅新嘢。我一星期最少都會睇一次，等我可以update吓出面啲人嘅水平，跟住就會抽其中一啲較好嘅作品做參考，然後刺激自己嘅創作靈感，呢個網頁已經喺我部電腦嘅bookmark入面。」
推介網頁：www.designersnetwork.com
張敬軒 網上尋寶
「我平時都好鍾意shopping，不過我都習慣喺網上買嘢，方便之餘又唔受時間限制，而且款式同種類都好多，真係超方便。
「我鍾意上去睇吓電子琴同絕版波鞋，有時睇吓睇吓，會發掘到寶藏，有啲喺街度都未必買得到。另外我間中都會攞啲二手玩具出嚟賣。」
推介網頁：www.ebay.com
方力申 睇運動網
「因為我好鍾意睇同運動有關嘅嘢，所以上親網都會睇ESPN個網同NBA個網。我上網好有規律，首先會check吓自己email，之後會睇呢兩個運動網，之後就會再睇報紙，留意吓當日嘅新聞。我主要會睇港聞同體育版，至於娛樂新聞就睇過就算，當然有關自己嘅新聞都會睇吓啦！」
推介網頁： http://espn.go.com/
採訪：駱華齡、卓寶花、張俊銘、王連連
