八方非常注重健康，特別鍾意食菜，噚日有間科技公司話成功研發咗一套可以分解殘留農藥嘅高能電子處理系統，負責人阿Ben好詳細解釋呢部儀器嘅操作原理，講講吓仲爆料話設計呢部儀器嗰位仁兄，正係中聯辦主任高祀仁嘅堂弟，名叫高振宇。
八方聽到梗係向中聯辦明查暗訪啦，得到嘅答案係：高主任並冇呢位堂弟。究竟有人升官發財唔認兄弟，定係有人認親認戚博宣傳？八方問番阿Ben，佢對追問亦有備而來，話兩人千真萬確係出生於同一條村，同一本家，四、五代之前嘅祖先仲係兄弟㖭（即係打埋算盤都算係疏堂兄弟）。
之後阿Ben仲引述高振宇話，高主任唔記得佢個名唔出奇，但見到面一定認得佢咁話……其實四海之內皆兄弟，佢咁講都唔錯得晒嘅。