民主黨最大隱憂係乜？原來係搵唔到「高人」領導。民主黨主席李永達宣布唔再玩，大熱門何俊仁勢將接任。俾黨內兄弟背後叫「高達」嘅李永達接受香港電台節目《發酵的男人》訪問時就自嘲，自己5呎3吋，何俊仁高佢少少，曾經有人統計過，美國歷任總統，冇一個矮過5呎9吋，由此可見自己的確欠缺咗啲政治魅力。
佢又話，以前有次選舉要同拍檔陳偉業影宣傳相，佢拍埋去只到陳偉業膊頭，差成6、7吋，搞到個攝影師擰晒頭，要搵3、4本電話簿墊高至影到。後來落區，啲街坊第一次見佢就話：「阿李生，你原來……幾紮實！」佢好感激街坊咁厚道。
要余若薇坐低傾
佢就好羨慕公民黨，位位都係「高人」，企出嚟都好有台型，但係佢一同余若薇傾偈就頭痛，「佢係黨魁，我又係黨魁，一企埋我要『岳』高頭同佢傾，所以我每次一定要佢坐低傾，大家平起平坐。」
由1985年開始參選嘅李永達話自己係黨內選舉經驗最多嘅一個，而且一路未輸過，係長勝將軍，到2000年立法會選舉至首次嚐到落敗嘅滋味，佢承認起初真係好難受，落敗第二日同單仲偕傾電話，佢卒之忍唔住，第一次喊出嚟，喊咗五分鐘，人生有一段短時間變得好灰濛，好彩佢當時只係44歲，可以企番起身，接受咗現實就係咁，跌過一次，人都成熟咗。
另一次失敗就係上屆特首選舉，佢話俾敵對陣營攻擊一早預咗，但係民主派嘅人都冷嘲熱諷話：「你幾高幾大呀，想做特首？」真係好難頂。佢估計今次梁家傑參選，提名票會多過佢上次，佢上次選，真係捱更抵夜幫佢嘅人，一隻手數得晒，梁家傑有十幾人幫佢，氣氛都好啲。