繼《聯合93》（United93）後，由金像導演奧利華史東（OliverStone）執導、奧斯卡「甩毛影帝」尼古拉斯基治（NicolasCage）擔正嘅《世貿中心》，又係另一套以911恐怖襲擊為題材嘅電影。向來演技出眾嘅尼古拉斯，今次為咗演活當日其中一位生還嘅勇敢紐約警察，竟然去到一個實驗大水槽體驗當事人困喺黑暗地洞嘅痛苦，真係令人佩服得五體投地。
奧利華史東精心籌備嘅911電影《世貿中心》，今個星期四正式喺本地上映。套片係從兩名奇迹生還警員嘅角度檢視911，希望藉此帶出人性最美好的一面。雖然尼古拉斯基治近年已淪為「甩毛影帝」，但佢個M字額加二撇雞，反而令佢扮起警員約翰麥洛連（JohnMcLoughlin）更加維肖維妙。
匿水槽體驗被困
一向擅長肢體語言嘅尼古拉斯，為咗了解角色，唔只喺拍攝期間同當事人共處，佢仲主動去到加州一個剝奪感官知覺嘅實驗大水槽，置身其中自閉多個鐘頭，去體驗當事人困喺黑暗地洞嘅痛苦，真係要向佢寫個服字。
至於喺奧斯卡最佳電影《撞車》（Crash）度表現突出嘅米高彼拿（MichaelPena），就飾演尼古拉斯嘅拍檔，佢為咗要扮成當事人韋占文諾（WillJimeno），仲狂操自己谷到成身肌肉。唔可以忽視嘅，仲有扮演占文諾太太嘅「斷背積」積嘉倫賀（JakeGyllenhaal）家姐瑪姬嘉倫賀（MaggieGyllenhaal），佢一個眼神同一個小動作都好似當事人上身，直情嚇親占文諾夫婦。
救援警員助拍攝
導演為以100%準確反映真人真事為大前提，請來當事人現身說法提供最詳盡的資料，並得到當日有份參與救援的警員和消防員協助拍攝。唔想令受害人家屬唔高興嘅奧利華坦言，《世貿中心》唔講政治，唔做政治分析，並放棄尖銳批評嘅態度，轉向以小人物嘅英勇事迹嚟撫慰美國民眾受傷心靈，佢話呢部係探索美國國家英雄主義又充滿博愛精神同有國際性嘅電影，唔少外國影評人都覺得套片拍得好震撼，仲會係明年奧斯卡熱門，唔知你又點睇？