旺區舖位價錢勁貴，買家要畀到好高價至能打動業主，完全冇水位可言，但唔少投資者買舖都係着重有冇水位，所以二三線地區舖位都開始成為搜購對象，好似大坑浣紗街一帶呢啲地點較靜嘅舖位，都一樣有投資者吼。
美聯舖位部營業經理文國華話，呢區剛啱錄得兩宗舖位買賣。銅鑼灣道110至114號，地下連1樓夾埋面積約5600呎，以約2750萬元轉手；個舖係大單邊，對正中華游樂會，地下部份交吉，其餘由茶餐廳、車房同甜品店承租，1樓租客係動畫設計公司；𠵱家月收租約12.58萬，計落租金回報已經有5.5厘，都算吸引。
而京街24號地下，面積約500呎，只係賣550萬，認真抵玩，呎價約1.1萬。個舖一樣係大單邊同埋有租約，租客係茶餐廳，月租約2.2萬元，回報4.8厘。